GENOTYPE A MUSULUNCI TARE DA BINCIKEN MASANA KASHI NA BIYU (2)
GENOTYPE A MUSULUNCI (2)
*
***A rubutun farko, daliban likitanci ko genetics za su iya ganin cewa nayi bayanin a gurgunce, ƙila haka din ne, amma ni nufina kawai inyi sharar fage ne kawai don mai karatu ya gane tushe da inda yan kimiyya suka yi tsalle suka bar Musulunci, ba koyar da genetics zan yi ba ballantana inyi komai filla-filla.
A Musulunci, Annabi Adam A.S asalin sa yumɓu ne da ruwa suka samar da jikin sa, haske da iska suka samar da ruhin sa, wannan ake kira “Elements of creation” wato sinadaran halitta, sune Earth, Water, Fire/Light da kuma Air. Abinda mutum yake ci (Earth) da abinda yake sha (water) da samun hasken rana ko zama cikin duhu (light/fire) da iskar da yake shaƙa (Air) suna da tasiri a jikin sa, sune suke inganta lafiyar sa ko sanya shi ciwo.
In aka yi binciken kwayoyin halitta a jikin Nana Hauwa, za a tarar da kaso mai yawa na kwayoyin halittar Annabi Adamu domin Allah ya halicci Nana Hauwa ne daga ƙashin haƙarƙarin Annabi Adamu, Amma ba tsaga jikin Adamu akayi aka ciro haƙarƙari aka halicci hauwa ba, kawai Allah yaso hakan ya faru ne kuma ya faru, cikin IKON SA.
Amma sauran yayan Annabi Adam da hauwa (mutane), ba kwaɓa su akayi kamar yadda akayi wa Adamu ba, ba samar dasu akayi daga jikin Adamu kamar yadda aka yiwa Hauwa ba, Alaƙar jiki da jiki cikin sha’awa (jima’i/sex) ne ya samar da su ta sanadin MANIYYI daga Namiji, da ginuwar jiki da ruhi a CIKIN mace (buɗuni ummahatikum).
MENENE MANIYYI?
Maniyyi shine Sperm/Semen (a turanci). Musulunci ya fassara shi a matsayin farin ruwa mai kauri wanda yake tunkudo kanshi daga al’aura saboda sha’awa mai ƙarfi ta hanyar jindadi (jima’i) ko Al’ada (mafarki). A Qur’ani, maniyyi shine nuɗfa (نطفة), yana fitowa ne daga tsakanin ƙashin baya da haƙarƙari (yakh-ruju min bainis sulbi wat-tara’ib).
A cikin Maniyyi (sperm/semen), Akwai “Sulalah” shine Spermatozoon (jimlar sa kuma spermatozoa), shine kimiyya ke cewa guda daya ne kawai cikin miliyoyin yan’uwan sa yake nasarar shiga cikin mace inda matakin juna biyu ke farawa, lallai haka ne a musulunci.
Spermatozoon shine sperm cell, yana da chromosome 23, in ya shiga cikin mace ya riski ƙwanta, sai su haɗe (shine nuɗfa’tun amshajin), itama ƙwan nata yana da chromosome 23, daga nan matakin ciki ke farawa, bayan sun samar da chromosome 46.
A gurguje, sharan fagen da zanyi kenan kan tushen mutum a fuskar addini da kimiyya, da matakin samun ciki. Yanzu yaya ake samun lafiyyen yaro a ciki, tun daga shigan maniyyi har haihuwa a fuskar musulunci, shine rubutuna na gaba Insha Allah.
✍️ Sidi Sadauki
