TARIHI

SHEHU TIJJANI BAHAUSHE NE

 

Ƙwarai kuwa, Shehu Ahmadu Tijjani RTA ɗin nan namu dai bahaushe ne ta wurin mahaifiyar sa, sunan ta Afiya, baiwa ce wacce Mijin ta ya samo ta daga ƙasar hausa, ya kaita Aini Madhi ya yanta ta, ya aure ta, Amma saboda tsananin wahalar juna biyu da tsangwamar abokan zama a gidan mijin nata, shiyasa dole tayi hijira daga Aini Madhi zuwa yankin Constantine/Rome inda ƙabilar Shawi suka tarbe ta domin sarkin su mutumin kirki ne, ya bata kulawa sosai har ta haihu lafiya, bayan ta haihu sai ta sa ma yaron nata suna Ahmad.

 

Baku fahimta ba ko?

 

Ina magana ne akan Sidi Ahmad Ammar ɗan Sidi Muhammadul Habib ɗan Sidi Abul Abbas Shehu Ahmad Tijjani RTA, wanda ake yawo da hoton sa a matsayin shine Shehu Tijjani mai ɗariƙa alhali jikan sa ne amma tabbas sunyi kama sosai.

 

Mahaifiyar sa ta sa masa suna Ahmad ne don ta yiwa Shehu Tijjani takwara, Sannan tayi masa alkunya da sunan sarkin nan wanda ya taimake ta wato “Ammar” saboda godiya bisa halaccin sa.

 

Watarana limamin masallacin Atiƙ a Aini Madhi yayi mafarki da Sidi Muhammadul Habib ɗan Shehu Tijjani RTA, yace masa “kaje ka gayawa ɗana Sidi Muhammadul Bashir cewa yana da ɗan’uwa kuma lallai yaje ya nemo shi”. Sidi Bashir kuwa ana gaya masa nan take ya tura mutane neman wannan ɗan’uwan nasa ko ina a ƙasar Algeria amma babu labarin sa.

 

Bayan lokaci ƙanƙani sai yaji labarin wani yaro mai abubuwan ban mamaki a garin “Annaba/عنابة” na Algeria, ya aika a roƙe su a taho dasu domin ya samu labari babu wanda ke yi musu dole ballantana wulakanci, saboda watarana Sidi Ahmad Ammar yana kiwo sai wani baturen faransa masu mulkin mallaka ya ɗaga hannu zai dake shi saboda dabbar yaron ta kusanci gonar sa, nan take hannun baturen ya sage, sai da yayi ta magiya yana ba yaron nan haƙuri sannan daga baya hannun ya dawo daidai, wannan labarin ya karaɗe ko ina, shiyasa ake shakkar tunkarar su da zalunci.

 

Ko da aka yi sa’a aka lallaɓa yaron nan da mahaifiyar sa suka iso Aini Madhi, Sidi Bashir yana ganin yaron, Allah yayi masa kashafi yaga tambarin su na zuri’ar Shehu Tijjani a tare dashi, ashe wannan yaro Sidi Ahmad Ammar ne da Mahaifiyar sa Afiya (Allah ya ƙara musu yarda). Sidi Bashir yayi farinciki sosai bisa haɗuwar sa da wannan ƙani nasa mai albarka kuma ba jimawa ya miƙa masa khalifancin Tijjaniyya sannan ya mai da hankali wurin bashi kulawa sosai, duk da shi Sidi Bashir ne babba, amma Allah ne a gaban sa ba mulki ba, shiyasa ya girmama hasken dake tare da ɗan’uwan sa.

 

A takaice, zuri’ar Shehu Tijjani sun yaɗu ne ta tatson Sidi Bashir da Sidi Ammar ya’yan Sidi Muhammadul Habib ƙanin Sidi Muhammadul Kabir, Allah ya ƙara musu yarda, damu tare dasu baki daya, Amin.

 

✍️ Sidi Sadauki

SHEKARU ASHIRIN (20) DA WAFATIN MAULANMU SHEHU ADAMU KONTAGORA (R.T.A) 1916-2003 AD

 

 

Shehu Adamu Haruna ɗan Sayyida A’isha, ya ƙare rayuwar sa ne kaf a cikin hidimar Allah da Manzon sa Sallallahu Alaihi Wa Alihi Wasallama.

 

Tun bayan haihuwar sa a shekaran 1344AH, wato 1916 AD, a garin Kotonkoro ƙaramar hukumar Bangi, Sheikh Adam ya fara karatu a gaban mahaifin sa Mallam Haruna, da kuma babban wan su Malam Muhammadu Dan Idi.

 

Bayan Shehu ya fara tasawa sai ya tattara ya bar gida ya tafi garuruwa daban-daban domin neman ilimin addini, daga ciki har da garin Hadejia, sannan ya tafi Maska, kana ya zauna Zaria daga bisani kuma Kano.

 

Shehu Adamu ya zama zaƙaƙuri acikin ilimi daban-daban, daga ciki har da ilimin li’irabi, wanda saboda kwarewar tasa ne ma ya ake masa inkiya da “Mai Li’irabi”.

 

Shekh Adam ya zauna a gidan Shehu Malam Tijjani ‘Yar mota, kuma yayi Tarbiyatul Azkar a wurin Shehul Hadi. Shehi ya zauna garin Chota ta ƙasar Niger don karantarwa ga daliban Shehun Chota, daga baya Shehu ya dawo Kontagora yaci gaba da yaɗa addini da kuma bada ilimi har sunan sa ya koma Shehu Adamu Kontagora,

 

Shehu Adamu Kontagora ya tsaya ka’in da na’in wurin hidima ga addinin musulnci da darika da kuma faila gaba daya, da ƙarfin sa da aljihun sa, Kamar dai yanda muka gani, kuma muka sani, aikin da ya gada a gidan su kenan.

 

Kuma har ila yau shima gidan sa na daya daga cikin manyan gidajen da ake bada ilimi a cikin garin Kontagora, da sauran ƙauyuka da ake kai wa karatun, kamar yadda aka saba tun yana raye.

 

Shehi yayi fama da jinya na rashin lafiya, kuma wannan bai hana shi bautar Ubangijin sa ba har ranar da yai wafati, an kai shi Minna da Nyamai a kasar Niger Republic dan neman lafiyar sa.

 

Shehu Adamu Kontagora yayi wafati a ranar wata Laraba da dare, 11/03/1424AH (Cikin watan Mauludil), Wanda yayi daidai da 13/05/2003AD, aka yi Janazar sa a ranar alhamis 14/05/2003AD, aka birne shi a Zawiyyar sa/gidan sa

 

Allah ya kara karamar Barzahu Alfarman Shugaba ANNABI Muhammadu ﷺ

 

Allah kabamu Albarkansa Dan Hidimar sa da Himmar sa. Amiiiin Yaa ALLAH

 

Safwan Jajjaye Rijau

Hadarar Shehu Habibu Garamu

Rigar Sayyida Fatimah al-Zahra AS

 

Sayyada Fatimah al-Zahra da Sayyadi Aliyu RA sun kasance ma’aurata masu kaunar junan su.

 

Ko zamu iya tuna yanayin gidan su yake? Yaya suka rayu? Sun yi rayuwa mai sauƙi. Ita ce sarauniyar Aljannah kuma shi ne Zakin Allah, duk da haka basu da abinci a gidansu. Kuma ba su mallaki duniya da yawa ba. Sun shafe kwanaki suna jin yunwa. Sun kwashe kwanaki suna fama.

 

Sun kwashe kwanaki suna gwagwarmaya. Babu wani abinci a gidan su mai kayatarwa. Babu kujera mai tsada da kayan daki masu tsada. Sai ruku’u da sujjada da addu’o’i da hawaye da tsantsar soyayya.

 

Don haka duniya ba wurin zama bale, muyi kokarin bautawa Allah Ubangiji mu don samu yarda a gare shi tare da bin tafarkin Annabi ﷺ

 

Allah ya bamu albarkacin su. Amiin

 

Daga: Babangida A. Maina

CIKAMAKIN WALIYAI (6)

 

AUREN SA DA RASUWAR IYAYEN SA.

 

Mahaifin Shehu Tijjani ya nema masa auren mace yar mutanen kirki mai cikakken tarbiyya a lokacin da ya zama matashi (ya balaga) domin ya tsare masa mutuncin sa da kuma samun rinjaye akan sharrin shaiɗan. A gidan mahaifinsa ya zauna da matar tasa cike da soyayya da begen juna. Kwatsam watarana a cikin shekarar 1166, a lokacin Shehu Tijjani yana da shekaru goma sha shida da haihuwa, cutar annoba ta kama mahaifi da mahaifiyar sa suka rasu tare, ance yini daya ne tsakanin su, Allah ya jaddada musu rahmah, Amin.

 

Shehu Ibrahim Niasse RTA yana cewa:

طَلَّقَ الشَّـيْخُ زَوْجَهُ إِذْ رَآهــَا * وَافَـقَـتْـهُ فِـي جِـدِّهِ الغَـيْدَاءُ

Shehu Tijjani ya saki matar sa a lokacin da ya ga kyanta na gogayya da himmar sa.

 

Wato Shehu Tijjani RTA yana zaune da matar sa lafiya lau amma sai ya ga akwai alamun himmar sa zata tawaya saboda dole ya raba lokacin sa na ibada da karantarwa ya ba matar tasa, bugu da ƙari can cikin zuciyar sa bashi da burin da ya wuce yayi tafiye-tafiye cikin duniya domin saduwa da manyan waliyai saboda ya riski abinda yake da buri na sha’anin yardar Allah.

 

Don haka watarana sai ya kira matar tasa ya nemi iznin ta akan ta yarda ya sauwaƙe mata (ya sake ta) saboda burin sa ba zai bashi damar sauke mata hakkokin ta na aure ba tunda tafiye-tafiye zai yi. Da yake mace ce mai albarka da fahimta saboda tarbiyar da ta samu, sai ta yarda kuma ta karɓi uzurin sa, ya bata dukiya mai yawa a matsayin kyautatawa gareta sannan ya sake ta saki daya kuma har zuwa lokacin rabuwar su, basu haihu ba.

 

Tarihi ya tabbatar sanadin wannan dukiyar ne matar da zuri’ar ta suka shahara fagen arziki saboda yawan sa da kuma albarkar Shehu Tijjani RTA.

 

✍️ Sidi Sadauki

CIKAMAKIN WALIYAI (5)

 

TASOWAR SA DA NEMAN ILIMIN SA

 

Ko ban faɗa ba, mai karatu zai gane cewa duk wanda Allah ya azurta da irin wayannan iyaye, dole ya samu cikakken kulawa na ilimi da tarbiya, haka ne ya kasance ga Shehu Tijjani kuwa, domin bayan ya tasa kaɗan, sai iyayen sa suka mika shi gun babban waliyyi mai suna Sayyidi Abi-Abdallah Muhammad ɗan Hamu Almadawiy (ya rasu 1162H) domin yayi karatu, kuma cikin ikon Allah ya haddace Alqur’ani bisa ruwayar warshu a hannun sa yana da shekaru bakwai a duniya.

 

Wannan malamin na Shehu Tijjani, ya sadaukar da lokacin sa wurin ilimantar da yara da manya, kuma ya gaji haka ne daga wurin malamin sa wanda yake babban waliyyi mai suna Sheikh Isa Bu’akaz Almadawi RTA wanda ya ga Allah (SWT) a mafarki (ru’uya), ya karantawa Allah Alqur’ani mai girma a ruwayar warshu, Allah yace “masa tabbas haka aka saukar da shi, babu abinda ka rage ko ka ƙara”.

 

Allahu Akbar!

 

Shehu Ahmad Tijjani ya karanta littattafan fiƙihu da na furu’a da adab da sauran su tun daga kan su Ahalari, Ishmawiy, Risala, Ibn Rushid da sauran su a wurin babban waliyyi masanin Allah mai suna Sidi Mubarak Bu’afiya Almadawiy RTA.

 

Watarana Shehu Ahmad Tijjani RTA ya fito daga aji sai yaga haske daga ƙasa zuwa samaniya, sai Annabi SAW ya bayyana, yace masa “Cigaba da juriya, kana kan tafarki madaidaiciya “, Shehu Tijjani ya tsorata matuƙa, ya ruga wurin gwaggon sa mai suna “Jurkhum” ya faɗa mata sai ta kwantar mai da hankali ta bashi abincin da yake so. Shehu Tijjani yana son Jurkhum sosai kuma daga baya ya faɗi cewa waliyiya ce babba wacce babu abinda mutum zai tsaya kan kabarin ta ya roki Allah shi, na sharri ko alheri, face sai Allah ya amsa masa, dalilin haka aka daina nuna kabarin nata har ya bace.

 

Kafin Shehu Ahmadu Tijjani RTA ya cika shekaru ashirin da daya a duniya, ya gama da duk wani ilimi na littafi na ilimin Shari’a da Sufanci. Ilimin Shehu Tijjani da yadda yake saurin fahimtar abubuwa da haddace su, kyauta ce daga Allah, babu tamkar sa a cikin abokan karatun sa, babu wani abu da zai sa a gaba bai cimma karshen sa ba, ba shi da karaya ko tsoro ko fargaba ko kaɗan, duk da shekarun sa kadan ne, amma ya tara ilimi na ban mamaki kuma tuni labarin ilimin ya sa mamaye garuruwan dake kusa da Ainu Madhi har ma akan zo gareshi domin neman ƙarin bayani da fatawa.

 

ALLAH KA AZURTA MU DA ILIMI MAI AMFANI IRIN NA SHEHU TIJJANI, KAYI MANA TSARI DA ILIMI MARA AMFANI WANDA YAKE SA A ZAGI SHEHU TIJJANI RTA.

 

✍️ Sidi Sadauki