SHEIKH USMAN KUSFA ZARIA – RIGI-RIGI NA ANNABI MUHAMMADU SAW.
SHEIKH USMAN KUSFA ZARIA – RIGI-RIGI NA ANNABI MUHAMMADU Sallallahu Alaihi Wa Alihi Wa Sahbihi Wa Sallamm
“Rigi-Rigi na Annabi Muhammadu” Sallallahu Alaihi Wa Alihi Wa Sahbihi Wa Sallamm. Yawanci idan yana Majlisi ya faɗi abubuwan al’ajabi ko na jinjina za ka ji taron ya kaure da kiran sunan Annabi “Aaaaannabi Muhammaduuuuuuu”, sai kaji an amsa.
Tsawon Shekaru kusan Takwas ina ajiye da Folder guda ta Audios ɗin Sheikh Usman Kusfa Zaria, wanda nauyin Folder ya kai 8GB tun a wancan lokacin, banda daga baya da Ibtila’i ya afkawa Computer ta, na rasa kaso mai yawa na files ɗin da suke kan HDD ɗin wannan computer, harda wannan Folder. Kowane file na Audion da nake da shi a wancan lokacin babu wanda ya gaza Awa Biyu (2hours). Shi baza ka ji shi yana karatun Hadisi ko Fiƙhu ba (A Audios ɗin sa da nake da su a wancan lokacin) sai dai kaji irin su Fassarar Jauhara da Asraran ta, Fassarar Salatul Fatihi da duk wani abu na Halarar Shehu Tijani Radhiyallahu Ta’ala Anhu. Wannan yasa nayi ta mamaki da naga ana Izgilanci wa Iliman da yake fitarwa. Ko da yake, ba abin mamaki bane a irin sanin da muka yiwa Munkirai. Dama da yawan mutanen mu Ƴan Izala/Wahabiyya duk abinda basu sani ba, a wurin su babu wannan abin, ko kuma Bid’a ne ko Kafirci ko Shirka (Allah ya shirya mana ku). Amma ina mai tabbatar muku, in dai Rigi-Rigi ne, Wallahi waɗannan abubuwan da yake fitarwa ba komai bane cikin abubuwan da ya sani, domin shi wani Ilimi Allah yayi masa wanda idan mutum bai saba da terminologies ɗin ire-iren waɗannan Iliman ba, zai zata sabon Ilimi yake fitarwa. Allah ya yi masa baiwa mai yawa a fannin Ilimin Baɗini. Kuma a cikin gidan Tijjaniyyah Shehu Usman Kusfa Zaria bai kai ɗigo ɗaya na waɗanda suke ɓoye ba. Shi ɗin ma, Allah ne yasan dalilin bayyana shi a yanzu ga waɗanda basu san shi ba sai yanzun.
Dalilin wannan rubutun shi ne, masu yi masa Izgilanci ba kai tsaye shi ko Ilimin sa suke yiwa ba. A’a! Shehu Tijani Radhiyallahu Ta’ala Anhu da abubuwan da suke da alaƙa da shi suke nufi da wannan Izgilancin, kuma mutumin da yake gidan Gilas ne yake kiran azo ayi wasan jifa saboda toshewar Basira. Akwai ƴanuwan mu da suke ganin kada adinga fitar da ire-iren waɗannan Iliman da Rigi-Rigi yake fitarwa, wanda Ni ina daga cikin masu ganin a fitar ɗin shi ne Alkhairi saboda shi Zamani ba shi da tausayi, idan yazo maka da wata Ƙa’ida, kayi haƙuri ka karɓa kawai, sai ku zauna lafiya, amma idan ka ƙi, kai ne za ka yi asara. Sai dai a kyautata amfani da kuma saka mizani. Amma maganar ɓoye irin waɗannan Iliman ayi haƙuri a bar ta. Wanda zai halaka, zai halaka, wanda zai rayu zai rayu kawai.
Ya Ku Munkirai! Baza’a daina fitar da Ilimi saboda inkarin ku ba, haka baza’a daina ambaton Shehu Tijani Radhiyallahu Ta’ala Anhu ba!
Daga: Mujtaba
