TARIHIN SHEIKH TIJJANI

CIKAMAKIN WALIYAI (3)

ƘABILAR SA (RTA)

Shehu Ahmad Tijjani RTA sunan ƙabilar sa “Abdah” (عبدة). Bisa al’ada, mafi yawan sharifai wayanda kakannin su suka yi hijira daga Madinah, sukan samu canjin ƙabila saboda auratayya a wata ƙasar, amma Shehu Ahmad Tijjani tasa ƙabilar bata sauya daga larabci zuwa wata ba.

Ƙabilar Abdah babbar ƙabila ce a ƙasar Morocco, sun zauna a ƙasar tun zamanin khalifancin muwahidin (خلافة الموحدين). Asalin su kuwa zuri’ar “Banu Ma’aƙil” ne wayanda suka yi hijira zuwa Morocco tareda kabilar “Banu Hilal” da “Banu Sulaym” a ƙarni na 11.

Jami’in diplomasiyya na ƙarni 19 ɗan ƙasar faransa mai suna “Eugène Aubin” yace ƙabilar Abdah suna da matukar ƙarfi, suna da kimanin ƙarfin makamai dubu talatin da biyar, kuma larabawa ne zalla, sun mamaye yanki mai albarka a ƙasar morocco, suna da arzikin dawakai da raƙuma kuma suna sahun ƙabilu biyar na “Quasi-Makhzen” a Morocco.

SUNAN SA NA “TIJJANI”

Daga Morocco ne Sayyidi Muhammad Salim (Na biyu) yayi hijirah zuwa Ainu Madhi na ƙasar Algeria.

Wannan kakan na Shehu Tijjani wato Sayyidi Muhammad Salim, Babban waliyi ne wanda ya riski mukamai 72 na ilimin Muhammadiya. Yana da ɗaki nasa shi kadai da yake shiga domin yin “halwa” da zikirori. Girman wulayar sa ta kai baya barin fuskar sa a buɗe a duk lokacin da zai fita daga gida zuwa masallaci, saboda duk wanda ya hada ido dashi, zai kamu da tsananin kaunar sa har yayi fiye da abinda mata suka yi na yanke hannayen su yayin da Annabi Yusuf ya gitta ta gaban su.

A Ainu Madhi din ne ya auri yar ƙabilar “banu Tujin/Tijan/Tijanata” wayanda suke karkashin ƙabilar “Berber” ko kuma “Amazig/أمازيغ”. Al’adar wannan ƙabilar, ya’ya suna dangantuwa ne da ƙabilar iyayen su mata, wannan ne yasa ake kira ko yin laƙabi ga ya’yan Sayyidi Muhammad Salim da “Tijjaniy”.

ALLAH SABODA SAYYADI MUHAMMAD SALIM, KA BIYA MANA BUKATUN MU DA GAGGAWA.

✍️ Sidi Sadauki

CIKAMAKIN WALIYAI (2)

*

NASABAR SA (RTA)

Shehu Ahmadu Tijjani cikakken sharifi ne (Jikan Manzon Allah) wanda nasabar sa take a bayyane saboda kasancewar iyaye da kakannin sa mutane wayanda suka shahara, amma shi kam duk da haka da kuma “salsalar” sa da ya gani a rubuce, bai sakankance ba har sai da ya sadu da Annabi (SAW) Ido da Ido, ya tambaye shi, ya Rasulillahi shin ni jikan kane da gaske? Annabi SAW yace masa kwarai, kai ɗana ne da gaske (har sau uku), yace masa nasabar ka ta wurin Imam Hassan zuwa Imam Aliy da Sayyada Fadima din nan, ingantacciya ce, sannan fa Shehu Tijjani ya samu natsuwa har yake rubutawa da hannun sa mai albarka “Alhassaniy” a gaban sunan sa.

Ga Nasabar sa kamar haka:

1. TA WURIN MAHAIFIN SA

Shine Sayyadi Ahmadu Tijjani Ɗan Sayyadi Muhammadul Fattah (wanda ake kira Ibn Umar), Ɗan Sayyadi Muhammadul Muktar, Ɗan Sayyadi Ahmad, Ɗan Sayyadi Muhammadu Salim (Na biyu), Ɗan Sayyadi Abil-eed/Abul Ayyad, Ɗan Sayyadi Muhammadu Salim (Na farko), Ɗan Sayyadi Ahmad Alwani, Ɗan Sayyadi Ahmad, Ɗan Sayyadi Ali, Ɗan Sayyadi Abdallah, Ɗan Sayyadi Abbas, Ɗan Sayyadi Abduljabbar, Ɗan Sayyadi Idris (wanda ake kira wusɗa), Ɗan Sayyadi Idris (wanda ake kira Akbar/Dakil), Ɗan Sayyadi Ishaq, Ɗan Sayyadi Aliyu Zainul Abideen, Ɗan Sayyadi Ahmad (wanda ake kira Shabih), Ɗan Sayyadi Muhammad Nafsuz zakiyya, Ɗan Sayyadi Abdallahil kamil, Ɗan Sayyadi Hassanul musanna, Ɗan Sayyadi Hassanus sibɗi, Ɗan Imam Aliy Da Nana Fadima Yar Manzon Allah SAW.

2. TA WURIN MAHAIFIYAR SA

Itace Sayyada Nana Aisha ƴar Sayyadi Muhammad Ɗan Sayyadi Muhammadu Sanusi (Allah ya kara musu yarda). Nasabar ta itama yana tukewa ne a gun Sayyadi Idris (Wanda ake kira Akbar, kakan Shehu Tijjani ta wurin uba din nan), a kan shi ne nasabar Shehu Ahmadu Tijjani ta wurin Mahaifiya da Mahaifi ya haɗu, don haka shi jikan Imam Hassan ne ta wurin uwa da uba.

ALLAH SABODA TSARKIN WANNAN NASABA, KA TSARKAKE MANA ZUKATAN MU, KA YAYE MANA DUK ABINDA YA DAME MU.

✍️ Sidi Sadauki

CIKAMAKIN WALIYAI (1)

*

GABATARWA

Godiya ta tabbata ga Allah wanda ya ce “Lallai waliyan Allah babu tsoro a garesu kuma ba zasu kasance suna yin baƙin ciki ba” (Suratu Yunus: 62). Dubun Salati da Aminci su cigaba da tabbata ga farkon halitta, cikamakin Annabawa kuma shugaban manzanni, wanda yake cewa “Allah yace duk wanda ya nuna kiyayya ga waliyyi na, hakika yayi shirin yaƙi dani” (Riyadus salihin: 95), A salatin kasa da iyalin sa da sahabban sa da bayin ka salihai.

Hakika nayi nufin hidima ga Shehu Ahmadu Tijjani RTA amma na rasa ta yadda zan aiwatar da haka, cikin falalar Allah sai naga dacewar in tsakuro tarihin sa daga taskar magabata domin in faranta ran masoyan sa dashi.

Ina mai neman uzuri da afuwa akan duk wani kuskure da mai karatu zai ci karo dashi cikin rubutun nan, ya karɓa da hakuri, ni bawa ne mai tsananin rauni.

1. HAIHUWAR SA

Maulanmu Shehu Ibrahim Niasse RTA yana cewa:

مولد الختم عام نقش تجلى * سيدا طاهرا وهو ذكاء

“Haihuwar cikamaki (na waliyai) ya kasance a cikin shekarar NAQ-SHIN, ya bayyana a matsayin shugaba mai tsarki mai cikakken hankali”.

NAQ-SHIN (نقش) shine 1150 a ilimin hisabi, wato harafin NUN yana daukar 50, QAF yana daukar 100, SHINUN yana daukar 1000. Abin nufi a shekara na dubu daya da dari da hamsin bayan hijirar Annabi SAW aka haifi Shehu Ahmadu Tijjani RTA, ranar 13 ga watan safar.

A garin “Ainu Madi” wanda yake kusa da laghouat a ƙasar algeria aka haife Shehu Ahmadu Tijjani RTA. Wannan garin yayi ƙaurin suna saboda tarin waliyan dake cikin sa tsawon zamani, kamar yadda Sidi Abdullahi ɗan Muhammad Al-iyyashi (wanda ya rasu hijira tana 1090) ya ruwaito a littafin sa mai suna “Rihila” bayan ya ratsa ta cikin garin a lokacin tafiye-tafiyen sa. Sidi Abdullahi ya sadu da kakan Shehu Tijjani kuma takwaran sa wato Sidi Ahmad, ya bayyana shi (Sidi Ahmad) a matsayin babban waliyi mai tarin ilimi.

✍️ Sidi Sadauki