MAULUD

AN GUDANAR DA GAGARUMIN TARON BIKIN MAULUDIN MANZON ALLAH SAW A GOMBE

Daga: Babangida A. Maina

An gudanar da gagarumin bikin Mauludin Annabi Muhammadu SAW a gidan Alh Ibrahim Sufi dake anguwan Danaje cikin birnin Gombe.

Taron Mauludin wanda aka saba gabatar duk shekara inda manyan baki daga sassa daban-daban na fadin Najeriya suke gabatar da kasidu da lakcoci akan tarihi na Manzon Allah SAW da halayen sada dabi’un sa.

An gabatar da takarda mai taken koyi da kyawawan dabiu na Manzon Allah SAW wanda Sheikh Nuhu Abdulwadud ya gabatar da wasu daga cikin mahalarta taro.

Hon Muhammadu Magaji Gettado kwamishina wanda ya wakilci gwamnan jihar Gombe Alh Muhammad Inuwa ya bayyana halaye na bayin Allah waliyai a matsayin abun koyi tare da godiya daga gwamnan jihar Gombe.

Hon, kwamishinan matasa na jihar Gombe yayi kira ga dukkan matasa da suyi koyi da kyawawan halayen da dabi’u irin na Fiyayyen Halitta Annabi Muhammadu ﷺ a kowanne hali na rayuwar su. Inda ya godewa duk wanda ya samu halartan taro Mauludin Manzon Allah SAW.

Daga karshe Sallaman Gombe ya bayyana sakon mai martaba sarkin Gombe a taron Mauludin, an gabatar da jawabai mabanbanta daga wurin malamai da zikirin da yabon fiyayyen halitta Manzon Allah SAW.

Sheikh Ibrahim Sufi wanda shine mai masaukin baki ya bayyana godiya ga Allah da masoya Manzon Allah SAW bisa halartan taro Mauludin Allah ya maimaita mana.

Allah ya Maimaita Mana Ya Kara Mana Soyayyan Annabi Muhammadu ﷺ Ya Sakawa Wadannan Bayin Allah Da Alkhairi. Amiin

MAULUD DAGA MAIDUGURI

Zaman Mauludin Fiyayyen Halitta Annabi Muhammadu ﷺ Wanda Aka Gudanar A Zawiyyan Maulana Sheikh Sharif Ibrahim Saleh Al Hussaini (Shugaban Masu Fatwa A Najeriya) Dake Birnin Maiduguri Jihar Borno.

Gwamnan Jihar Borno Prof Babagana Umara Zulum Tare Da Tawagar Sa Sun Samu Halartan Mauludin Da Kuma Dubban Jama’a Masoya Daga Sassan Duniya.

A Cikin Jawabin Prof, Babagana Umara Zulum Gwamnan Jihar Borno Ya Bayyana Cewa Ya Zama Wajibi Duk Wani Musulmi Mai Kishin Addinin Sa Da Kuma Fiyayyen Halitta Annabi Muhammadu ﷺ Yaso Annabi SAW.

Ya Kara Cewa Soyayyan MANZON ALLAH SAW Wajibi Ne, Kuma Yana Kira Ga Daukacin Al’ummar Musulmi Na Kowanne Bangare Mu Dage Da Addu’o’i Zaman Lafiya A Ko’ina A Fadin Najeriya Musamma Jihar Borno.

ALLAH Ya Maimaita Mana Ya Kara Mana Soyayyan Annabi Muhammadu SAW. Amiin

Babangida A Maina

Rayuwar Annabi SAW Ta Kasance Abar Koyi Tun Ma Kafin A Saukar Da Wahyi. Inji Gwamnan Jihar Bauchi.

“Tun kafin sauƙar masa da wahayi, rayuwar Annabi Muhammadu tsira da amincin Allah su tabbata a gare shi ta kasance abar kwaikwayo ga ɗaukacin al’uma.

“Juriya, sadaukarwa, zaman lafiya, taimako da neman ilimi na cikin ababen da Manzon Allah ya koyar da sahabban sa masu daraja.

“Waɗannan da ma wasu na cikin kiran da nayi ga ɗaukacin al’umar musulmi da suka yi cincirindo daren jiya a filin wasa na tunawa da marigayi Firaminista Abubakar Tafawa Balewa a nan fadar jiha don taya mu bikin mauludin wannan shekara.

“A yau Lahadi da ake gudanar da zagaye a Bauchi da kewaye, ina kira ga al’uma da su gudanar da wannan biki cikin nutsuwa, lafiya da bin doka da oda alfarmar wanda muke bikin domin sa.

“Kada mu gajiya wajen kwaikwayon halayyen fiyayyen halitta tare da yawaita masa salati don neman sabati, yalwatuwar arziki da zaman lafiya ga jihar Bauchi da ƙasar mu Najeriya.

Allah ka cigaba da shiga lamuran mu alfarmar Annabi Muhammadu ɗan Amina”, cewar Gwamna Bala na jihar Bauchi.

Daga Lawal Mu’azu Bauchi

Mai taimakawa Gwamna Bala Mohammed

Kan harkokin Sabbin kafafun sadarwa

TAKAITACCEN BAYANI, CIKIN KHUDBAR DA AKA TABA GABATARWA A MASALLACIN MANZON ALLAH (S.A.W) DAKE DA ALAKA DA TA YAU.

An gabatar da wannan Khudbah ranar 23 Muharram 1442.

1. Mutum zai kasance tare da wanda yake so. Son Annabi (Sallal Laahu Alaihi Wa Alihi Wa Sallam) sharadi ne ga imani. Mafi girman hanyar son Annabi (Sallallahu Alaihi Wasallam) ita ce koyi da rayuwarsa, da darajojinsa, da halayensa.

2. An zabe shi daga mafi girman mutane. Yana da tsatso da salsala mai cike da daraja da ɗaukaka. Kakanninsa sun cika da nagarta da daukaka. Mafificinsu shi ne Muhammad bn Abdullahi bn Abdul Muddalib, Qurashi, Hashimi Arab. Mahaifiyarsa ita ce Aminah bint Wahb Al-Qurashiyyah. Allah Ya zaba masa wuri mafi kyau. An haife shi a Makkah, Ummu Alqura, kuma a can ne ALLAH yayi masa wahayi.

3. Lokacin da ya cika shekara arba’in, sai Allah ya sanya shi ya zamo Annabi. Ya aiko masa da wahayi, ya sanya shi karshen Annabawa da Manzanni. Ya fara saqonsa da kiran mutane zuwa ga bauta wa Allah Shi kaɗai, daga barin shirka, da kwaɗaitar dasu kyawawan halaye, da umarni da kyakkyawa, da hani da mummuna da zalunci da fasadi. Ya yi haka ne a Makka tsawon shekara goma sha uku, yana kiran mutanensa dare da rana, a boye da bayyane.

4. Allah ya umarci Annabinsa yin hijira zuwa mafi tsarkin kasa, wato Madina Zama cikinsa yana da kyau. Shi ne birnin imani, kuma zuwa gare shi, muminai sukai gaggãwa. A cikinta akwai sojojin Allah, Ansar.

5. A cikin shekaru goma na Madina Allah ya kammala addininsa. Jama’a sun karbi addinin Allah da manyan igiyoyin riko. Musulunci ya yadu a cikin kasashen Larabawa kamar yadda mutanensa suka mika wuya [ga Allah], suna karbar Musulunci.

6. A watan Rabi Al-Awwal, a shekara ta goma sha daya bayan hijira, bayan hajjin bankwana ta riski Manzon Allah (Sallallahu Alaihi Wasallam) da radadin ciwo, nayi fansar mahaifana da shi.! Allah ya ba shi zabi, kuma ya zabi haduwa da Ubangijinsa, ya ce: “Ya Allah Al’ummata, Ya Allah Al’ummata, Ya Allah Al’ummata. Lokacin tafiya ya gabato. Don haka ya yi nasiha (Sahabbansa) da bankwana. Duniya ta yi duhu a tafiyarsa, Musulmi suka wargaje..!

A KARSHE DAI DUK WANDA YA GUJI MAULUDI A GIDA NIGERIA, TO ZAI RISKESHI A MADINAR MANZON ALLAH (S.A.W).

Muhammad Usman Gashua

ALKAIRIN ALLAH, YARDARSA DA KUMA JIBANCINSA SU KARA TABBATA GA WANNAN BAWA NASA Prof. Ibrahim Maqari (H).

Akullum zukatanmu kara damfaruwa suke ga sonsa da kuma kaunarsa saboda ALLAH, saboda shi kam ya tattare dukkanin siffofi da dabi’u kyawawa, da suke sahhalewa zukata so da kaunar mutane kwatankwacinsa, soyayya mai cike da sallamawa.

Kwanaki 4 zuwa 5 da suka gabata, munje domin kai kayan tallafin abinci da Buhuna, ga wadanda Iftila’in ambaliya ya shafa a wasu kauyuka, wanda shi wannan bawan ALLAH ya jagoranci samarwa.

Ko ayau da na ga wasu idanuwa, da suka bukaci irin wannan tallafi a garin Gashua, amma suka rasa, anan na kara fahimtar tsadar irin abinda ya jagoranci samarwa ga al’ummun wadannan kauyuka.

Shidin ya kasance jagorane da yake wanzar da karantarwa a aikace.

ALLAH YA KARA MASA LAFIYA DA TSAWON KWANA, YA BUDE ZUKATAN WADANDA ALLAH YA BAIWA HALIN DA ZASU IYA TAIMAKAWA AL’UMMA SU ZO SU TALLAFA MUSU.

Muhammad Usman Gashua