RAYUWAR ANNABI

RAYUWAR ANNABI S.A.W KAFIN WATAN AZUMIN RAMALANA Part (6) DAGA TASKAR UMAR CHOBBE).

 

Ita kuwa cewar da Sallallahu Alaihi Wasallama ya yi: “Azumi da idin qaramar Sallah da layya na karba sunansu ne idan an yi su tare da mutane.” Wannan magana na nufin ne ba ya halatta ga wasu mutane su yi tunga, su yi Azumi ko Idi ko layya ba tare da sauran jama’a ba.

 

Lalle ne kowane musulmi ya yi waxannan ibadodi tare da Sarki da sauran jama’a.

 

Ka ga da Allah zai sa masu wa’azi a wannan zamani namu su rungumi wannan aqida, su kuma yayata ta tsakanin musulmi, da kansu ya hadu a cikin gunadar da wannan ibada. Kuma rikitta da rigingimun da ke qamari a tsakanin tsirarun musulmi a qasashen gabasci da yammacin Turai sun faxa. Mafi sauqin hanyar da wannan manufa ke iya tabbata kuwa a hasashena, ita ce kafa wata hukuma ko cibiya mai zaman kanta wadda za ta kula da farawa da qarewar kowane wata kamar yadda Shari’a ta tanada. Ta haka da zarar sun tabbatar da tsayuwar watan Azumi ko qarewarsa, sai su kama Azumi tare su aje tare.

 

Idan kuwa suka neme shi qaura-wambai, amma ganinsa ya faskara, to sai a jira Sha’abana ya cika kwana talatin, sannan a dauki Azumin. Shi kuma Ramalana ya cika talatin xin sannan a aje. Idan kuwa har hakan ta faskara, wato suka kasa ganin watan a garin da suke, to sai su yi aiki da ganin da wani gari na musulmi da ke kusa da su, suka yi masa. Su dauki Azumi tare da su. Iyakar abin da za su iya yi kenan, Allah kuwa ba ya dora wa rayuwa abin da ba ta iya dauka.

 

Wannan mas’ala ta tabbatar da kamawar watan Azumi magana ce babba, da Malamai suka dade suna qoqari a kanta, kuma har yanzu ba su daina ba. A kan haka ina so in jawo hankalinmu bisa wasu al’amurra kamar haka:

 

Ya zama wajibi a kan kowanenmu ya ji tsoron Allah, ya kiyaye tare da tsare alfarmar ibadarsa da ta sauran mutane. Duk wata magana ko fatawa da za mu yi riqo da ita ta wani Malami, to mu tabbata ta dace da abin da nassosan Shari’a suka qunsa. Kada mu riqe su saboda kawai Malamin dan mazhabarmu ne, ko garinmu ko qungiyarmu.

 

Sannan kuma yana da matuqar kyau mu fahimci cewa, matsalar ganin wata, matsala ce da ke lale marhabin da qoqarce- qoqarcen Malamai na Ijtihadi. Kuma babu wanda ya isa ya hana wani daga cikin Malaman yin ban hannun makaho da wani a cikinta. Bai kuma kamata hakan ya zama dalilin gaba da qiyayya da xaixaicewa tsakanin musulmi ba. Domin kuwa babban abin da nassosan Shari’a ke qoqarin tabbatarwa shi ne haxin kan al’umma.

 

Idan hukumar da abin ya shafa ta tabbatar da tsayuwar wata ko da, ta wata hanya mai rauni, to, ba ya kamata wasu ‘yan tsirarun mutane su qi yarda da hukuncin, don yin hakan za ta haifar da wani rikici da rarrabuwar kan jama’a.

 

Babban abin baqin ciki duk bai fi irin yadda wasu mutane ke shafa wa wannan ibada mai girma kashin kaji ba, ta hanyar amfani da ita su riqe wani makahon karatu, suna matsayin masu goyon bayan mutanen wani gari. Kuma su dage kai da fata a kan sai kowa ya bar ganewarsa ya dawo ga tasu, suna yi suna kuma zuba wa ra’ayin nasu rigar Shari’a har da naxa masa rawaninta, ba tare da sun kula da abin da zai haifa wa jama’a xa mai ido ba.Kai! Allah dai ya kiyashe mu, ya kuma taimake mu a kan gane makamar Addini, tare da biyar Sunnar Shugaban Manzanni Sallallahu Alaihi Wasallama sau da qafa.

 

Ya kuma sa mu kasance masu son ganin al’ummar musulmi ta zama tsintsiya madaurinki daya.

 

A taqaice wannan shi ne irin shirin da Annabi Sallallahu Alaihi Wasallama a matsayinsa na babban Malamin wannan al’umma, kan yi, don fuskantar watan Azumin Ramalana.

 

Kuma haka ya kamata a sami duk wanda ke fatar haduwa da rahamar Allah a gobe qiyama na yi.

 

Domin shi watan Azumi, kamar irin baqon nan ne da ke ciyar da masu masaukinsa. Saukarsa na farkar da gafalalle, ta fadakar da wanda ke farke.

 

Da zarar ya kama ko wane Malami zai qara kuzari da qaimi ga qara jagorancin jama’a zuwa ga bautar Allah, da yin nesa-nesa da su daga ayyukan zunubi da ashsha.

 

Da haka sai wuraren masha’a su koma fanko, masallatai kuwa su cika su batse, alherai su daxa qaruwa, komai ya tafi yadda ake buqata. Allah yasa muna fahimtar karatun

 

Allah ya karbi Ibadun mu na wannan watan Albarkan ANNABI S.A.W. Amiin Yaa ALLAH

RAYUWAR ANNABI S.A.W KAFIN WATAN AZUMIN RAMALANA Part (5) DAGA TASKAR UMAR CHOBBE

 

BAYANI AKAN TABBATAR DA KAMAWA WATA Part 2:

 

A wani Hadisin kuma da Sallallahu Alaihi Wasallama yace: “Wata kan yi kwana ashirin da tara. Kada ku kama Azumi har sai kun ga wata da qwayar idonku.

 

Idan kuma kuka kasa ganinsa saboda wani dalili, to ku bari sai Sha’abana ya cika kwana talatin.”

 

Saboda haka babu wani dalili da zai sa mutum ya dauki Azumi kafin a tabbatar da tsayuwar wata, wai don ko daka yi. Domin kuwa Shari’a ta riga ta yi wa al’amarin makama.

 

Saboda haka ne ma Annabi Sallallahu Alaihi Wasallama ya yi mana kashedi da “Ko daka yi” ya ce: “Kada ku kuskura ku kama Azumi tun watan Ramalana bai tsaya ba, ku bari sai an gan shi da qwayar ido, sannan, idan kuma an ga Sha’abana ta wannan hanya, ku aje. Idan kuma giragizai suka hana ku ganin sa, to, ku jira Sha’abana ya cika qwana talatin.

 

A wani Hadisi kuma ya ce: “Kada ku yi Azumin nafila da kwana daya ko biyu kafin watan Ramalana ya tsaya, sai fa wanda ke yin wani Azumi daban, shi kam irin wannan mutum ya samu ya yi Azuminsa.”

 

Ka ga a shar’ance abin da wadansu mutane ke yi wato Azumin “Ko daka yi” laifi ne. Saboda wadannan Hadissai da suka tabbatar da rashin halaccin fara Azumin Ramalana ba tare da an ga jinjirin watansa da qwayar ido, ko aka tabbatar da cikar Sha’abana kwana talatin ba,

 

Ammaru dan Yasir Raliyallahu Anhu ya ce: “Duk wanda ya yi Azumin “Ko-aka yi” haqiqa ya saba wa Baban Qasimu Sallallahu Alaihi Wasallama.

 

Amma kuma duk da haka, idan mutum bai san yadda ake kirdadon tabbatar da tsayuwar jinjirin wata ba, kuma ba ya da wanda zai isar masa a kan haka. Idan ya yi wannan Azumi na “ko-aka yi” amma da niyyar idan an yin, to, ya riga ya kimtsa. Idan kuma ba a yin ba, to, ya dauki Azumin nasa a matsayin nafila.

 

To, Azuminsa ya inganta a zance mafi rinjaye. Saboda niyya na tabbata ne a lokacin da masaniya ta tabbata, kuma hukuncinsu daya ne.

 

Idan har ya tabbata cewa watan na Ramalana ya tsaya, to wajibi ne ya yi wa Azumin nasa matsaya.

 

Da kuma a irin wannan hali zai yanke niyyar yin Azumin nafila ne, ko Azumi kawai, to, da sakal. Domin kuwa umurnin da Allah ya yi masa shi ne na daura niyyar yin Azumin Ramalana, wanda ya wajaba a kansa, wanda kuma idan ba shi ya yi ba, da sauran magana.

 

Amma idan ba ya da masaniya da cewa watan Azumi ya tsaya, to, ba wajibi ne a kansa ya yanke wa Azumin nasa hukunci ba.

 

Duk kuwa Malamin da ya wajabta yanke hukuncin a irin wannan hali, to kamar ya daura aure ne tsakanin ruwa da wuta.

 

Allah shi ne masani.

 

Yau da musulmi za su dawo su qanqame wannan Sunnah ta Manzo. Su tsaya a kan ganin qwayar ido ko cikar watan Sha’abana kwana talatin, don tabbatar da kamawar watan Azumi, da an huta.

 

Wata fitina ba za ta sake tashi ba, balle a yi ta jayayya a kan halaccin yiwuwar amfani da hisabi da ilimin zamani, ko rashin haka.

 

Domin kuwa a shar’ance ba ya hallata a qetare abin da nassi ya zo da shi. To, kuma ga shi abin da nassi ya qunsa a wannan al’amari, shi ne dogara a kan gani na qwayar ido, ba hisabi ba.

 

Amma kuma duk da haka, da za a yi amfani da na’aurorin zamani a tabbatar da haihuwar watan, sannan ya bayyana a fili a gan shi da ido, to, wajibi ne a yi aiki da hakan. Domin kuwa waccan magana ta Annabi Sallallahu Alaihi Wasallama ba ta batse hakan ba, balle. Don cewa ya yi “Kada ku dauki Azumi ko ku aje shi sai an ga jinjirin watansa da qwayar ido.

 

” Idan kuma hakan ta faskara, sai batun jiran kwanakin Sha’abana su ciki talatin, kamar yadda nassin ya tabbatar.

 

Kuma duk da haka, ba laifi ba ne a yi amfani da tabaran hangen nesa kamar kuma yadda yin hakan ba tilas ba ne. Saboda abin da Sunnah ta nuna qarara, shi ne dogara a kan gani irin na qwayar ido, kuma na al’ada kawai. Kuma shi ne kawai abin da ke wajaba a kan al’umma don tabbatar da bayyanar jinjirin wata. Allah shi ne mafi sani. Allah yasa muna fahimtar karatun

 

Allah ya karbi Ibadun mu na wannan watan Albarkan ANNABI S.A.W. Amiin Yaa ALLAH

RAYUWAR ANNABI S.A.W KAFIN WATAN AZUMIN RAMALANA Part (4) DAGA TASKAR UMAR CHOBBE).

 

1.5 BAYANI AKAN TABBATAR DA KAMAWA WATA:

 

A Zamanin Annabi Sallallahu Alaihi Wasallama baya soma Azumin Ramalana ba, face ya tabbatar da kamawar watan, ta hanyar samun shedar wani mutum daya da ya ga watan da qwayar idonsa, ko tabbatar da watan Sha’abana ya cika kwana talatin.

 

Wadannan hanyoyi biyu na tabbatar da kamawar Watan Azumi, na daga cikin martabobin da wannan addini ya kebanta da su, kuma wadanda suka lamunce masa dacewa da kowane zamani da kowane wuri, saboda komai nasa a fili yake, ta yadda gaba dayan mutane na iya zama sheda a kai.

 

Daga cikin Hadissan da ke tabbatar da dogarar da Annabi Sallallahu Alaihi Wasallama ke yi a kan tabbatar tsayuwar watan Azumi, a kan ganin qwayar ido akwai:

 

Hadisin dan Umar Raliyallahu Anhu wanda ya ce: “Mutane sun sa ido ga neman ganin jinjirin watan Azumi, sai na gayawa Manzon Allah Sallallahu Alaihi Wasallama cewa tabbas ni na gane shi.

 

Sai kuwa ya kama Azumi, ya kuma umurci mutane da su kama.”

 

Sai kuma Hadisin dan Abbas Raliyallahu Anhuma wanda ya ce: “Wani Balaraben qauye ya zo wurin Annabi Sallallahu Alaihi Wasallama yace: “Tabbas ni na ga jinjirin watan Azumi.”

 

Sai Annabi Sallallahu Alaihi Wasallama ya ce masa: “Ko ka yi imani da babu abin bauta wa da gaskiya sai Allah? ” .

 

Shi kuwa ya karba masa da cewa: “Eh, na yi.”

 

Sai kuma Annabi Sallallahu Alaihi Wasallama ya sake tambayarsa: “Ko ka yi imani da cewa, Muhammadu Manzon Allah ne?

 

Balaraben yace: “Eh, na yi.”

 

Daga nan sai Annabi Sallallahu Alaihi Wasallama yace wa Bilalu: “Tafi ka shelanta wa mutane kowa ya ta shi da Azumi gobe.”

 

Ka ga a cikin wadannan Hadissai, musamman ma na biyun, akwai babban darasi, da ke tabbatar da girman wannan addini. Wanda kuma ya kamata a ce Malamai da shugabannin wannan al’umma sun kwaikwaya. Wato su fahimci cewa kowane mutum amintacce ne kuma karbabbe a idon Shari’a, a mataki na farko.

 

Ba kuma za a qi karbar maganarsa ba a kan komai, sai idan wani mugun hali ya bayyana gare shi, wanda zai soki lamiri da adalcinsa. Ko kuma a wayi gari tare da fahimtar cewa, yana da qarancin hankali, ko kuma ba ya son kowa da alheri sai kansa.

 

Wannan ko shakka babu haka yake. Domin ka ga Annabi Sallallahu Alaihi Wasallama ya yarda da maganar Balaraben qauye a kan wani babban al’amari a Musulunci, wato Azumi, ba kuma tare da wani irinsa ya goya masa baya ba, shi Balaraben.

 

Annabi Sallallahu Alaihi Wasallama bai yi la’akari da kasancewar Azumin Ramalana ginshiqin addini ba, balle ya nemi shedar taron jama’a a kan tsayuwar watansa. Wannan aqida kuwa, ita ce abin da ya kamata masu tsananta wa mutane al’murran addini, su fahimta su kuma kama, tare da komowa a kan tafarki madaidaici.

 

Haka kuma daga cikin Hadissan da ke tabbatar da dogarar da Annabi Sallallahu Alaihi Wasallama kan yi a kan cikar watan Sha’abana kwana talatin, kafin ya kama Azumi, idan ganin watan Azumi da qwayar ido ya faskara, akwai cewar da ya yi wa Sahabbai, su dogara a kan ganin qwayar ido ga watan ba hisabi ba.

 

Kuma su tabbatar da qarewarsa ta wannan hanya. Yace: “Kada ku kama Azumi sai an ga wata da qwayar ido. Haka kuma kada ku aje shi, sai an ga watan Sallah da qwayar ido.

 

Kuma kada ku yarda da wata hanya da ba wannan ba. Idan Kuma kuka kasa ganinsa saboda wani dalili, to ku bari sai watan Sha’abana ya cika kwana talatin.

 

Da zarar mutum biyu sun bayar da sheda, to ku kama Azumi, ku kuma aje idan irinsu suka bayar da shedar qarewarsa.”   Allah yasa muna fahimtar karatun.

 

Allah ya karbi Ibadun mu na wannan watan Albarkan ANNABI S.A.W. Amiin Yaa ALLAH

RAYUWAR ANNABI S.A.W KAFIN WATAN AZUMIN RAMALANA Part (3) DAGA TASKAR UMAR CHOBBE

 

1.4 Bayanin Wasu Hukunce- Hukuncen Azumi:

 

Cewa ANNABI S.A.W nayi wa Sahabbansa bayanin wasu hukunce-hukuncen Azumi, abu ne da ba ya buqatar kafa hujja domin tabbatarsa.

 

Domin kuwa abubuwan da wannan littafi ya qunsa gaba daya na tabbatar da haka ne.

 

Iyakar abin da za mu ce a wannan sashe shine, buqatar kawai da ake da ita ga Malamai da masu da’awa a wannan zamani namu, shine su mayar da hankali ga karantar da mutane hukunce-hukuncen na Azumi tun kafin watan nasa ya kama.

 

Su kuma ci gaba da yin haka a tsawon kwanakinsa. Kowa daga cikinsu ya yi iyakar yinsa, ta hanyar qirqiro salailai da dabaru daban-daban da za su taimaka masu ga tabbatar da wannan guri.

 

Kai! Yin haka ma kusan wajibi ne domin kuwa jahilci a yau ya yi wa musulmi riga da wando. Kuma masu fadakarwa da wayar wa jama’a da kai a kan al’amurran addini sun qaranta, musamman a cikin ya’ayyuhannasu.

 

Kai! Ko a cikin ya’auyyuhallazina amanu, abin sai hattara. Su kuwa sauran jama’a musulmi, wadanda ba Malamai ba; mazansu da mata, ba abin da ya kamace su illa su mayar da hankali ga neman sanin makamar hukunce-hukuncen Shari’a wadanda suka shafi ibadodi na yau da kullum, da irin shirin da ya kamata su yi don fuskantar wannan wata na Azumi mai alfarma.

 

Su lizimci karanta littafai, da sauraren kasakasai, da halartar wuraren wa’azi da tafsirin Alqur’ani. Domin kuwa babu yadda za a yi aikin mutum ya yi kyau face ya qetaro irin wadannan matakai. Yin haka ko shakka babu wajibi ne a kansu, matuqar suna son tsira da wani abu gobe qiyama.

 

Domin kuwa duk wanda ya aikata wani aiki ba yadda Manzon Allah Sallallahu Alaihi Wasallama ya ce a yi shi ba, to, ya yi aikin banza. A duk lokacin da kuma mutum ya dage kai da fata a kan biyar tafarkin Annabi Sallallahu Alaihi Wasallama da koyi da shi, a cikin komai nasa, da ya hada da magana da aiki da gargadi, to shi ne mutum na gari wanda kuma ya yi gam da katar. Allah yasa muna fahimtar karatun

 

Allah ya karbi Ibadun mu na wannan watan Albarkan ANNABI S.A.W. Amiin Yaa ALLAH

RAYUWAR ANNABI S.A.W KAFIN WATAN AZUMIN RAMALANA Part (2) DAGA TASKAR UMAR CHOBBE

 

1.3 Yin Bushara ga Sahabbansa:

A duk lokacin da watan Azumi ke goshin kamawa, Annabi Sallallahu Alaihi Wasallama kan tara Sahabbansa ya yi masu bushara da irin alhairan da watan ke dauke da su.

 

Yakan yi haka ne da nufin yi wa Sahabban nasa qaimi, don zaburar da su, su zare dantse, kowa ya kwashi rabonsa. Akwai Hadissai da dama da ke bayani a kan haka, ga kadan daga cikinsu:

 

Annabi S.A.W yakan ce masu: “Idan Watan Azumi ya kama, ana bude qofofin samu’u hayan-hayan, a kuma rufe qofofin Jahannama kaf, sannan kuma a daure Shaidanu.”

 

Yakan kuma ce: “Da zarar daren farko na Watan Azumi ya kama, sai a daure shaidanu a kuma ququnce aljannu, a rufe qofofin Wuta ba za a bude ko daya daga cikinsu ba, a kuma bude na Aljanna, ba za a rufe ko daya daga cikinsu ba.

 

Sai kuma wani mai shela ya yi kira ya ce: “Duk mai nufin alheri ya matso ga dama ta samu, duk kuma mai nufin sharri ya kama kansa. Kuma Allah ya yi alkawalin ‘yanta wasu bayi daga shiga Wuta, kowane dare.”

 

Yakan kuma gaya masu cewa:“Watan nan na Azumi mai abarka ya kama. Allah ya wajabta azuminsa a kanku. A cikinsa ne ake bude qofofin sama’u, a rufe na Jahimu, a kuma daure shaidanu. Haka kuma Allah na da wani dare a cikinsa wanda alfarmarsa ta fi ta wata dubu.

 

Duk wanda bai sami alherin da ke cikinsa ba, ya tabe har abada.” Yakan kuma gaya masu cewa: “Haqiqa a cikin Aljanna akwai wata qofa ana kiran ta Rayyanu, ta nan ne masu Azumi za su bi a ranar qiyama. Babu kuma wanda zai shige ta bayan su. Za a kira su ne daban ba tare da kowa ba, a bude masu ita, a kuma mayar a rufe har abada.”

 

Da wannan kuma muke kira da babbar murya, ga masu wa’azi da shugabannin musulmi, da cewa ya kamata su kula da wadannan Hadissai na bushara, su watsa su cikin duniyar Musulunci, don mutane su san girman Watan Azumi da irin falalar da yake tare da ita. Su kuma koya masu yadda za su ci moriyar wannan gajiya tasa.

 

Domin kuwa ta haka ne kawai farin cikin kamawar watan za ta zama hantsi leqa gidan kowa. Wanda za ta sa kowa ya shagaltu da neman masaniya da makamar ibadar. Ba kawai a taqaita ga shirya gara da daula ba, ta yadda har manufar Azumin za ta kasa tabbata ga mafi yawan mutane.

 

Allah ya sa mu dace, Amiin Yaa ALLAH